Microsoft Released Windows 11 with android apps support

 

مائیکرو سافٹ نے ونڈوز 11 کو ریلیز کردیا

 کئی ہفتوں سے سامنے آنے والی خبروں کے بعد اب ونڈوز 11 کا اعلان کر دیا گیا ہے۔ مائیکروسافٹ نے ونڈوز 11 بہت سی اہم تبدیلیاں کی ہیں۔ ڈیزائن کے لحاظ سے دیکھیں تو مائیکروسافٹ نے سٹارٹ بٹن کو بائیں جانب نیچے سے اٹھا کر درمیان میں نیچے رکھ کر دیا ہے۔اس ایک تبدیلی ہی سے ونڈوز11 کا ڈیزائن دیکھنے میں میک او ایس  اور کروم او ایس جیسا لگنے لگا ہے۔اس کے علاوہ مائیکروسافٹ نے سٹارٹ مینو کے سٹائل میں بھی تبدیلی کی ہے۔

ونڈوز 8 سے چلے آنےو الے ٹائلز ڈیزائن کو ونڈوز11 میں ختم کر دیا گیا ہے۔ صارفین کو اب سٹارٹ مینو میں سب سے اوپر سرچ  بار نظر آئے گی جبکہ اس کے نیچے صارفین کی پن کی ہوئی ایپلی کیشنز کے آئیکون ہوں گےاور ساتھ ساتھ مقررہ فائلوں کے لنکس بھی ہوں گے۔سٹارٹ مینو میں فائلوں کی تجاویز صرف ایک ہی کمپیوٹر کے لیے نہیں ہوں گی۔

یہ صارف کی تمام ڈیوائسز جیسے سمارٹ فون اور دوسرے کمپیوٹروں پر بھی ایک سی ہوں گی۔۔

ونڈوز 11 کا سٹارٹ مینو موبائل میں استعمال  ہونے والی ایپلی کیشن کے لانچر کی طرح ہے۔ ونڈوز 11 میں دیئے گئے سنیپ لے آؤٹس(Snap Layouts) فیچر سے صارفین ونڈوز کے انٹرفیس کو بہتر طریقے سے کسٹومائز کر سکتے ہیں اور پہلے سے موجود لے آؤٹس میں اپنی مرضی کے لے آؤٹ بھی استعمال کر سکتے ہیں۔

ونڈوز سٹور میں بھی مائیکروسافٹ نے کچھ تبدیلیاں کی ہیں جو کہ ونڈوز 10 اور ونڈوز 11 میں سامنے آنے والی ہیں۔

اب صارفین اپنی پسندیدہ ایپلی کیشنز کو براؤزر سے بھی انسٹال کر سکتے ہیں۔اس کے لیے براؤزر ایک منی ورژن سٹور کے طور پر کام کرتے  ہوئے صارفین کو  تیزی سے ایپلی کیشنز انسٹال کرنے کی سہولت فراہم کرے گا۔ مائیکروسافٹ  اپنے سٹورز کے ذریعے ڈویلپرز کے لیے کمائی کرنے کے مواقع کو بڑھانا چاہتا ہے۔ مائیکروسافٹ کا کہنا ہے کہ وہ ڈویلپرز کو اپنے سٹور میں اپنی کامرس کو شامل کرنےاور 100 فیصد آمدن خود ہی رکھنے کی سہولت دے رہا ہے۔

مائیکروسافٹ اس آمدن سے کچھ بھی نہیں رکھے گا۔ اس کے علاوہ اگر ڈویلپرز چاہیں تو  وہ مائیکروسافٹ کامرس کا بھی استعمال کرسکتے ہیں، جس میں آمدن کا 85 فیصد حصہ ڈویلپرز کا ہوتا ہے جبکہ 15 فیصد مائیکروسافٹ کا۔

ونڈوز 11  میں کی گئی انقلابی تبدیلیوں میں سے ایک انتہائی اہم تبدیلی اس میں اینڈروئیڈ ایپس کی سپورٹ کو شامل کرنا ہے۔ اب صارفین اینڈروئیڈ ایپس کو مائیکروسافٹ سٹورز سے ہی  براہِ راست کمپیوٹر میں انسٹال کر سکیں گے ۔

یعنی اب کمپیوٹر پر اینڈروائیڈ ایپس چلانے کے لیے صارفین کو دیگر بھاری بھر کم تھرڈ پارٹی سافٹ وئیر استعمال کرنے کی ضرورت نہیں ہے۔ ونڈوز11 میں اینڈرائیڈ ایپس کی سپورٹ انٹل  کے ساتھ پارٹنر شپ کا نتیجہ ہے۔ انٹل بریج ٹیکنالوجی کا بنیادی مقصد اینڈروئیڈ ایپلی کیشنز کو x86 ڈیوائس پر چلنے کے قابل بنانا ہے۔ایک رپورٹ کے مطابق انٹل کے ساتھ شراکت داری کے باوجود یہ فیچر اے ایم ڈی اور اے آر ایم ڈیوائس پر بھی کام کرےگا۔امید ہے کہ جلد ہی یہ دوسری ڈیوائسز پر بھی کام کرے۔

ونڈوز 11 پچھلے تمام ورژنز کے مقابلے میں بہت تیز رفتار ہے۔جبکہ ونڈوز اپ ڈیٹس بھی اب 40 فیصد کم سائز میں ہوں گی اور تیزی سے انسٹال ہوں گی۔ مائیکروسافٹ کا دعویٰ ہے کہ ونڈوز 11 سے لیپ ٹاپ کی بیٹری ٹائمنگ بھی بہتر ہوگی ۔